Аб нас

Ёсць версіі на іншых мовах: English, Deutsch

Сардэчна вітаем Вас у Фондзе Конрада Адэнаўэра!

Свабода, справядлівасць і салідарнасць з'яўляюцца галоўнымі прынцыпамі працы Фонду Конрада Адэнаўэра (Konrad-Adenauer-Stiftung, скарочана – KAS/ФКА). ФКА – гэта палітычны фонд, набліжаны да Хрысціянска-дэмакратычнага саюзу Германіі (Christlich Demokratische Union Deutschlands, скарочана – CDU/ХДС). Як адзін з сузаснавальнікаў ХДС, першы Канцлер ФРГ сп. Конрад Адэнаўэр (1876-1967) спалучаў хрысціянска-сацыяльныя, кансерватыўныя і ліберальныя традыцыі. Яго імя звязанае з дэмакратычным узнаўленнем Германіі, прыналежнасцю да трансатлантычнай супольнасці ў знешняй палітыцы, ідэяй еўрапейскага адзінства і арыентацыяй на сацыяльную рынкавую эканоміку. Яго духоўная спадчына для нас і надалей з’яўляецца адначасова і задачай, і абавязкам.

Мы грунтуем нашае супрацоўніцтва на еўрапейскім і міжнародным узроўні на імкненні даць людзям магчымасць самарэалізоўвацца і жыць у свабодзе і годнасці. Арыентуючыся на гэтыя каштоўнасці, мы робім свой унёсак у тое, каб Германія адпавядала сваёй адказнай ролі ў свеце.

Мы намагаемся натхніць людзей будаваць сваю будучыню, кіруючыся гэтымі каштоўнасцямі. Праз больш як 70 офісаў і праектаў у больш чым 120 краінах свету мы робім свой унёсак у падтрымку дэмакратыі, прававой дзяржавы і сацыяльнай рынкавай эканомікі. З мэтай захавання міру мы вядзём няспынны знешнепалітычны дыялог, а таксама падтрымліваем кантакты паміж культурамі і рэлігіямі.

У цэнтры для нас стаіць чалавек са сваёю годнасцю, сваімі правамі і абавязкамі. Ён для нас – першапачатак сацыяльнай справядлівасці, свабоднай дэмакратыі і ўстойлівага развіцця. Збіраючы разам людзей, якія прымаюць на сябе грамадскую адказнасць, мы ствараем актыўныя сеткі кантактаў у сферы палітыкі, эканомікі і грамадства. Нашае кіраванне ведамі ў палітычнай сферы павялічвае шанцы на сацыяльна справядлівы, экалагічна адказны і эканамічна эфектыўны працэс глабалізацыі.

Мы супрацоўнічаем з дзяржаўнымі ўстановамі, партыямі, арганізацыямі грамадзянскай супольнасці, а таксама з выбранымі элітамі. Грунтуючыся на нашых мэтах і каштоўнасцях, мы імкнёмся і ў будучыні паглыбляць палітычнае супрацоўніцтва на рэгіянальным і глабальным узроўнях, асабліва ў галіне падтрымкі краінаў, што развіваюцца. Разам з нашымі партнёрамі мы робім свой унёсак у стварэнне міжнароднага парадку, які дазваляе кожнай краіне развівацца свабодна і самастойна.

У сувязі з цяперашняй палітычнай сітуацыяй у Беларусі праца Фонду Конрада Адэнаўэра там абмежаваная. Пададзеная яшчэ ў 2004 годзе заяўка на рэгістрацыю ФКА ў Беларусі да гэтага часу ўладамі не задаволеная. Таму месцам знаходжання новага Прадстаўніцва ФКА быў абраны Вільнюс. Фонд мае намер адчыніць офіс у Мінску. Калі палітычная сітуацыя ў Беларусі зменіцца ў такой ступені, што будзе магчымым разглядаць прысутнасць Фонду ў краіне, офіс можа быць перанесены з Вільнюса ў Мінск.

Галоўным напрамкам працы Фонду Конрада Адэнаўэра ў Беларусі з’яўляецца падтрымка тых грамадскіх сілаў, што імкнуцца да пабудовы свабоднай, дэмакратычнай і прававой Беларусі, якая зойме пачэснае месца ў еўрапейскай супольнасці дзяржаваў. Для дасягнення гэтых мэтаў ФКА праводзіць, перш за ўсё, палітычна-адукацыйныя і палітычна-дарадчыя мерапрыемствы, а таксама праграмы дыялогу і інфармацыйныя праграмы ў Германіі і ў Брусэлі.

Галоўныя тэматычныя сферы:

  • Кансалідацыя і ўмацаванне дэмакратычных сілаў у Беларусі;
  • Падтрымка структурных зменаў у беларускай эканоміцы ў напрамку сацыяльнай рынкавай эканомікі;
  • Інфармацыйная праца з насельніцтвам Беларусі ў галіне перспектывы еўрапейскай інтэграцыі.