Վորկշոփի առաջնային պլանում դրված էին կուսակցությունների մասին վերլուծությունները Հարավային Կովկասում, կուսակցական համակարգերի զարգացման դինամիկան , կուսակցությունների ընդհանուր պատկերը Եվրոպայում և, ընդհանրապես, կուսակցական քաղաքականության դերն ու խնդիրները: Հանուն խաղաղության, ժողովրդավարության և զարգացման Կովկաս Ինստիտուտի Պրոֆեսոր Գիա Նոդիան վորկշոփի մասնակիցներին ներկայացրեց հարավկովկասյան տարածաշրջանի կուսակցությունների ընդհանուր պատկերը և մասնակիցներին ներքաշեց Հարավային Կովկասում կուսակցությունների ժողովրդավարական զարգացումների պայմանների, հարավկովկասյան կուսակցությունների քաղաքական հիմնական կողմնորոշման և վերջին տասնամյակներում դրանց զարգացման շուրջ քննարկումներին:

Դր. Ֆլորիան Հարթլեբը Եվրոպական Ուսումնասիրությունների կենտրոնից և Մարկ Հաուփթմանը Յենայի Ֆրիդրիխ-Շիլլերի անվան համալսարանից ներկայացրին Եվրոպական Ժողովրդական կուսակցության եվրոպական կուսակցական ուղղվածությունը, կառուցվածքն ու արժեքները, ինչպես նաև համացանցի դերը կուսակցական քաղաքականության մեջ, մասնավորապես ընտրապայքարում: Երիտասարդ քաղաքագետները ինտերակտիվ վարժությունների միջոցով ուսուցանվեցին նաև քաղաքական ուղերձների ռազմավարական ծրագրման և զարգացման վերաբերյալ:

Վորկշոփի մասնակիցները հնարավորություն ունեին ծանոթանալ այն գործոններին, որոնք բնութագրում են քաղաքական և գաղափարական բազմակարծությունը Եվրոպայում: Առանձնակիորեն շեշտվում էր ներքին կուսակցական ժողովրդավարության կարևորությունը` որպես ժողովրդավարական կամքի կերտման կարևորագույն նախադրյալներից մեկը: Պարզ դարձավ, որ հարավկովկասյան կուսակցություններում ներքին կուսակցական կառուցվածքը, սկսնակ կադրերը և ծրագրային ուղղվածության ներքին կուսակցական քննարկումները թույլ են:

Եվրոպական կուսակցական ընդհանուր պատկերի համատեքստում ամառային դպրոցի մասնակիցները կարողացան ծանոթանալ նաև եվրոպական կուսակցական քաղաքականության դերին ու խնդիրներին:

Երիտասարդ քաղաքագետները հնարավորություն ունեին նաև վորկշոփի շրջանակներում սովորել կուսակցական քաղաքական զարգացման նախագծեր մշակել: Վորկշոփի ընթացքում նրանք, փոքր խմբերի բաժանվելով, կազմեցին և ներկայացրին նախագծերի օրինակներ: Վորկշոփի մասնակիցների միջև աշխույժ քննարկումներ ծավալվեցին Հայաստանի, Ադրբեջանի ու Վրաստանի համապատասխան կուսակցությունների ծրագրի, աշխատանքի ու արժեքների վերաբերյալ: Քննարկումներից պարզ դարձավ, որ հարավկովկասյան տարածաշրջանի երիտասարդ քաղաքագետների կողմից փորձի փոխանակման ու հաղորդակցման մեծ պահանջ կա, և որ նրանց համար շատ կարևոր է դուրս գալ տարածաշրջանային կուսակցական ընդհանուր պատկերից և ընդլայնել իրենց մտահորիզոնը` ծանոթանալով եվրոպական կուսակցական քաղաքականությանը: