კვლევის შედეგების პრეზენტაცია „ევროკავშირსა და საქართველოს შორის სამუშაო ძალის მობილობის სარგებელი და ხარჯები“ - რეგიონული პროგრამა „სამხრეთ კავკასიის პოლიტიკური დიალოგი”
განხილვა
Details
კვლევა ჩატარდა პროექტის „პოლიტიკის კვლევა მდგრადი ეკონომიკური განვითარებისთვის“ ფარგლებში და განხორციელდა „პი ემ სი“ კვლევითი ცენტრისა და კონრად ადენაუერის ფონდის მიერ.
კვლევაში წარმოდგენილია ევროკავშირსა და საქართველოს შორის სამუშაო ძალის მობილობის სარგებლის და ხარჯების ანალიზი. კერძოდ, რა მოსალოდნელი უპირატესობები და გამოწვევები აქვს არსებულ და ვიზა ლიბერალიზაციის შემდგომ მიგრაციას ქვეყნის ეკონომიკურ განვითარებაზე.
„სამუშაო ძალის მობილობა რესურსების ეფექტიანი განაწილებისა და გამოყენებისთვის მნიშვნელოვან წინაპირობას წარმოადგენს და დიდი როლი აკისრია ეკონომიკის განვითარებაში. იმის გათვალისწინებით, რომ დღის წესრიგში დგას საქართველოსა და ევროკავშირს შორის გამარტივებული სავიზო რეჟიმის შემოღება, სამუშაო ძალის მობილობისა და შრომითი მიგრაციის საკითხები უახლოეს მომავალში კიდევ უფრო დიდ მნიშვნელობას შეიძენს და ამდენად საჭიროა, როგორც ზოგადად პროცესის სწორი შეფასება, ისე შრომით მიგრაციასთან დაკავშირებით სწორი და გამართული პოლიტიკის შემუშავება“ განაცხადა თამარ ჯუღელმა, „პი ემ სი“ კვლევითი ცენტრის კვლევითი მიმართულების ხელმძღვანელმა.
„კვლევის შედეგად შემუშავდა შემდეგი რეკომენდაციები: მონაცემთა ბაზის შექმნა საქართველოს მიგრანტთა რაოდენობის, ადგილსამყოფელის და დასაქმების შესახებ; საქართველოს შრომისუნარიანი მოსახლეობის მონაცემთა ბაზის შექმნა (განათლება, პროფესია, კვალიფიკაცია) ევროკავშირის შრომით ბაზარზე “skill matching” - ისთვის; მიგრაციასთან დაკავშირებულ საკითხებზე სამთავრობო და არასამთავრობო სტრუქტურებს შორის თანამშრომლობის გააქტიურება; ვიზის ლიბერალიზაციაზე მოსახლეობისთვის ინფორმირება; ევროკავშირის ბაზარსა და ლეგალურ ჩარჩოებზე პოტენციური მიგრანტების ინფორმირება; დაბრუნებულ მიგრანტთა ხელშემწყობი პროგრამების განვითარება;
აღნიშნული რეკომენდაციების პრაქტიკაში დანერგვა ხელს შეუწყობს ვიზის ლიბერალიზაციის სარგებლის მაქსიმალურად ათვისებასა და ხარჯების მინიმუმამდე შეამცირებას“- განაცხადა მკვლევარმა ია ერაძე.
