KAS-Community-Advocacy-Programm 2022 - Монгол дахь Суурин төлөөлөгчийн газар
Өмнөх жилүүдийн адилаар хөтөлбөрт оролцогчид Монголын улс төр, нийгэм, эдийн засгийн бүлэг сэдвийн хүрээнд практик мэдээллийг хүлээн авсан. Мөн хувь хүний хөгжил, сэтгэл судлалын бүлэг сэдвээр баяжуулж сургалтын хөтөлбөр боловсруулсан нь энэ жилийн хөтөлбөрийн нэгэн онцлог байв. Монголын шилдэг мэргэжилтэн, сургагч багш нарыг урьж оролцуулах замаар мэдээлэлд лүн шинжилгээ хийж сурахад нь томоохон түлхэц боллоо.
КАС-ийн Олон нийтийн нөлөөллийн хөтөлбөр нь өнөөг хүртэл Монголын цор ганц хөгжлийн бэрхшээлтэй буюу тусгай хэрэгцээт хүмүүст зориулсан энэ төрлийн хөтөлбөр юм. Саад бэрхшээлгүй зорчих орчин, явган хүний зам талбайн хүндрэл, хүртээмжгүй нийтийн тээвэр, шат босго зэргээс улбаатай хөгжлийн бэрхшээлтэй хүмүүс одоог хүртэл нийгмийн өдөр тутмын харилцаанд оролцох, нийгэмд нөлөөллөө үзүүлэх боломж хомс байна, дэд бүтцийн асуудал нь ялгаварлан гадуурхалт болон хувирчээ. КАСКАП хөтөлбөр нь нийгмийн харилцаанд нөлөөллөө бий болгоход нь, мөн нэгэн баг хамт олон болж хамтран ажиллахад нь дэмжлэг үзүүлэхээс гадна тэдгээр хүмүүст өөрсдөд нь тулгамдаж буй асуудлыг өөрсдийнхөөрөө шийдвэрлэх боломжийг бүрдүүлэх мэдлэг, мэдээлэл хүргэх нэгээхэн зорилгыг тээж ирсэн.
Хөтөлбөрийн оролцогчид нэг долоо хоногийн хугацаанд нөлөөллийн төлөвлөгөө-төсөл боловсруулсан. Семинар хичээлийн мэдээллийг хамгийн сайн батжуулах арга зам бол практикт хэрэгжих бололцоотой төлөвлөгөө боловсруулах явдал юм. Тэд шинээр олж авсан мэдээллээ ашиглан дараах 3 төслийн санаа боловсруулж, хөгжүүлсэн байна:
Нэгдүгээрт, сонсголын болон харилцааны бэрхшээлтэй иргэдэд зориулсан дохионы хэлмэрчийн туслалцаа, үйлчилгээ бүхий гар утасны аппликейшн хөгжүүлэх.
Хоёрдугаарт, Боловсролын яаманд хүсэлт гарган “хөгжлийн бэрхшээл-ялгаварлан гадуурхалтын эсрэг” ажлын хэсэг байгуулах замаар тусгай хэрэгцээ, хөгжлийн бэрхшээлийн талаар зөв ойлголт түгээн таниулах сургалтын хөтөлбөрт өөрчлөлт оруулах.
Гуравдугаарт, нийслэл Улаанбаатар хотын захирагчийн албатай хамтран соён гэгээрүүлэх, “Хүртээмжтэй хот” нөлөөллийн ажил. Ингэхдээ Улаанбаатар хот орчмоор Нийслэлийн засаг дарга болон хотын удирдлага болсон албан тушаалтнуудын хамт хараагүй болон тэргэнцэртэй иргэдийн аялал зохион байгуулах төлөвлөгөөнүүдийг тус тус санаачлан боловсруулжээ.
