Details

კონრად ადენაუერის ფონდმა, საქართველოს პარლამენტის ევროპასთან ინტეგრაციის კომიტეტთან და არასამთავრობო ორგანიზაცია „European Time“-თან ერთად, გამართა ორდღიანი სემინარი, რომელშიც მონაწილეობა მიიღეს რეგიონალური პარლამენტის კომიტეტის თანამშრომლებმა სომხეთიდან, აზერბაიჯანიდან, მოლდოვადან და უკრაინიდან.

აღმოსავლეთ პარტნიორობამ, ევროპის პოლიტიკის მიმართულებით, ხელი შეუწყო პროექტის განვითარებას, რომელიც ეფუძნება განსხვავებულ მისწრაფებებსა და ამბიციებს პოსტსაბჭოთა სივრცეში მყოფი ქვეყნებისთვის.

საქართველომ, მოლდოვამ და უკრაინამ 2014 წლის 27 ივნისს ხელი მოაწერეს ევროკავშირთან ასოცირების ხელშეკრულებას, რამაც სამომავლოდ ხელი უნდა შეუწყოს ევროკავშირთან ამ ქვეყნების პოლიტიკური და ეკონომიკური ურთიერთობების გაღრმავებას. სომხეთმა 2013 წლის 3 სექტემბერს სტრატეგიული მნიშვნელობის შემობრუნება მოახდინა და ევრაზიის საბაჟო კავშირში შესვლა განიზრახა. აზერბაიჯანი მრავალვექტორულ საგარეო პოლიტიკას ახორციელებს და დაინტერესებულია ევროპასთან თანამშრომლობით ენერგო-პოლიტიკის სფეროში.

აღნიშნულიდან გამომდინარე იკვეთება რიგი საკითხებისა: როგორი იქნება ჩამოთვლილი ქვეყნების ევროპასთან სამომავლო ინტეგრაცია, პროექტის განხორციელების სამომავლო გეგმები და საჭიროა თუ არა მოიძებნოს ის ალტერნატიული გზები და მოდელები, რათა მოხდეს ევროკავშირთან ამ ქვეყნების დაახლოება.

სახელწოდების "Strategies and Models for Rapprochement with the European Union - Rethinking the Eastern Partnership“ ქვეშ გაერთიანდნენ ევროპასთან ინტეგრაციის კომიტეტის თანამშრომლები საქართველოდან, მოლდოვადან, უკრაინიდან, სომხეთიდან და აზერბაიჯანიდან. მათ იმსჯელეს ისეთ საკითხებზე, როგორიცაა სამოქალაქო საზოგადოება, აღმოსავლეთ პარტნიორობის ქვეყნების ევროკავშირთან დაახლოების შანსები და რისკები, პროგრესი სავიზო რეჟიმის ლიბერალიზაციის თვალსაზრისით და აღმოსავლეთ პარტნიორობის ქვეყნებთან ახალი მოდელებისა და სტრატეგიების შემუშავება.

დასკვნით ნაწილში, მონაწილეებმა შეიმუშავეს ახალი საპარლამენტო და სამოქალაქო საზოგადოების ურთიერთთანამშრომლობის შესახებ რეკომენდაციები.