Основната намера да се напише ова дело произлезе, пред сė од потребите на студентите што студираат на правните студии, на политичките студии, на студиите по новинарство, како и на студиите по односи со јавноста, организирани како студии од прв циклус, а, секако и на студентите од вториот циклус, мастер студии на насоката уставно право и политички систем и мастер студиите по политички науки. Истовремено, со оглед на целите на секој универзитетски учебник, веруваме дека ова дело ќе им биде од полза и на сите заинтересирани субјекти надвор од универзитетите кои се занимаваат или се интересираат за оваа значајна проблематика.

Правото и религијата никогаш не биле автономни и независни категории една од друга.

Од секогаш религијата имала влијание во креирањето на правните системи, најнапред на полисите, на заедниците, а подоцна и на државите, како и обратно, правото низ човековата историја вршело суштинско влијание врз религијата и нејзините експоненти. Ноторен факт е дека религијата е вградена во темелите на сите модерни правни системи што егзистираат во бројни држави, почнувајќи од оние на Средниот Исток, преку Африка, Европа, до Латинска и Северна Америка и Азија. Колку и како религијата извршила влијание врз правото на одделните правни системи е прашање на кое аналитичарите можат да дадат прецизен одговор.

Секако, и обратната релација е мошне интересна и важна - колку правото и конкретно воспоставените правни системи извршиле или вршат влијание врз дообликувањето на религијата и на религиозните субјекти и правила.                       

Во овој контекст, за нас од посебен интерес се истражувањата на начините како уставно-правното уредување, како уставно-правните системи на државите имаат влијание врз религијата, врз верските здруженија, како и врз остварувањето на човековите слободи и права. Ова прашање е неспорно дека има милениумска традиција.

Оттаму доаѓа и заклучокот дека на човекот му стојат на располагање огромни историски искуства, различни видови на согледувања и безброј практични примери каде се воочени меѓусебните влијанија на правото со религијата и на религијата со правото.

Меѓутоа, иако голем број теоретичари имаат оставено сопствен белег во откривањето на смислата и законитостите на овие две глобални и цивилизациски теми, сепак и денес е голем интересот на научната јавност за уште едно ново препрочитување на досегашните текстови и утврдување на сопствен дискурс при анализата на овие феномени.

Веројатно една од причините за ова лежи во динамичноста на правото и развојот на државата, од една, и фундаменталното значење на религијата врз таа динамичност и комплексност, од друга страна.

Интелектуалниот интерес за релациите меѓу овие две категории е детерминиран и од индивидуалниот пристап на секој од истражувачите дека можеби е нешто испуштено од претходниците, дека можеби нешто е поинаку прикажано или недоволно објаснето.

Токму овие мотиви, надополнети со теориската празнина во однос на разјаснувањето на односот право и религија во нашата земја, беа клучната детерминанта да направиме детална анализа на оваа обемна и прилично комплексна материја.

Како автори на учебникот се надеваме дека навлеговме во секое сокаче објаснувајќи ги при тоа најважните елементи  со должно внимание.

Напоменуваме дека ова е прв учебник по “Право и религија”на Правниот факултет „Јустинијан Први“, но и во државата.

Делото „Право и религија“ е шестиот учебник кој го издаваме како резултат на континуираната и долгогодишна поддршка, што како автори ја добиваме од Фондацијата „Конрад Аденауер“.

До сега, како дел од овој мега проект, беа издадени следните учебници:

Политички партии и интересовни групи, како и англиската верзија на учебникот со наслов „Political parties and interest groups“, во 2016 година;

Современи политички системи, како и англиската верзија на учебникот со наслов „Contemporary political systems“, во 2018 година, како и учебникот Парламентарно право, во 2019 година.

Имајќи го во предвид истакнатото, како автори, изразуваме искрена благодарност до претставништвото на Фондацијата „Конрад Аденуер“, во Скопје затоа што ја препознаа вредноста и ја поддржаа реализацијата на  оваа проектна идеја, овозможувајќи натамошно да се осовремени образовниот процес на македонските универзитети, но и да се олесни студирањето бидејќи студентите овие дела ги добиваат целосно бесплатно. Секако, имајќи го во предвид карактерот на материјата со која се занимаваме во книгите, вклучително и во оваа, веруваме и дека сите ентузијасти надвор од универзитетите во општеството, својата жед за поголемо знаење за политичките партии, за политичките системи, за законоданата власт, како и за односот помеѓу правото и религијата ќе можат уште повеќе да ја задоволат, што претставува уште еден аргумент повеќе во приког на вредност на овој исклучително значаен издавачки проект.