КОНФЕРЕНЦИЈАТА ВО ВАНЗЕ - КАНЦЕЛАРИЈА НА ФОНДАЦИЈАТА ВО СЕВЕРНА МАКЕДОНИЈА
Event
Details
Филмот ја прикажува средбата на водечките претставници на нацистичкиот режим од СС, Канцеларијата на Рајхот, министерствата, полицијата и администрацијата утрото на 20 јануари 1942 година во вила на езерото Ванзе во близина на Берлин. Состанокот на кој Рајнхарт Хајдрих, шеф на главната канцеларија за безбедност на Рајхот, безбедносната полиција и СД, го покани како „состанок проследен со појадок“, подоцна ќе биде означен во историјата како „Конференцијата во Ванзе“. Единствената тема на агендата тоа утро беше она што нацистите го нарекоа „Конечно решение на еврејското прашање“: организација на систематско масовно убиство на милиони Евреи низ Европа. Филмот му дава на гледачот увид во шокантната „нормалност“ што се прикажува за време на состанокот додека се разговара за процедурите, организацијата и координацијата, како и за одговорностите за убиството на милиони луѓе како да е тоа секојдневен административен акт.
Филмот е заснован на оригиналниот записник од Конференцијата во Ванзе, снимен од Адолф Ајхман, кој се смета за клучен документ за истребувањето на Евреите и холокаустот. Сепак, овие записници не се стенографски, туку претставуваат записници за текот и заклучоците од состанокот.
На отворањето со поздравно видео обраќање ќе се обрати Проф. Д-р Норберт Ламерт, Претседател на Фондацијата Конрад Аденауер и поранешен Претседател на Германскиот Бундестаг. Официјални обраќања ќе имаат Даниел Браун, Официјален претставник на Фондацијата Конрад Аденауер во Северна Македонија, Горан Садикаријо, Извршен директор на Фондот на холокаустот на Евреите од Македонија, Катрин Оствалд-Рихтер, Раководител на Гете-институтот Скопје, Пепо Леви, Претседател на Еврејската заедница во Република Македонија и Ото Граф, Заменик Амбасадор на Сојузна Република Германија во Република Северна Македонија.
Прикажувањето на филмот ќе се случи на 24 јануари (вторник) со почеток од 19:00 часот во Кинотека на Северна Македонија. Ве молиме потврдете го Вашето присуство најдоцна до 20 јануари (петок) на skopje@kas.de.
Филмот во истиот период ќе биде прикажан и во канцелариите на Фондацијата Конрад Аденауер во Загреб и Сараево.
