Nga 17 deri më 19 tetor 2025, Fondacioni Konrad-Adenauer (KAS) në bashkëpunim me Democracy+ (D+) organizoi “Kampin Rinor mbi Inteligjencën Artificiale dhe Demokracinë” në Hotel Solid, Suharekë. Kampi mblodhi të rinj nga i gjithë Kosova për të kuptuar transformimin e demokracisë në epokën digjitale, sfidat e IA-së dhe mundësitë e reja për inovacion etik dhe aktivizëm qytetar.
Kampi filloi me fjalët hyrëse të Granit Tërnavës (KAS) dhe Valmir Ismailit (D+).
Sesioni i parë, Demokracia në tranzicion – nga hapësira qytetare në hapësirën digjitale, i udhëhequr nga Bernard Zeneli, analizoi kalimin nga politikat tradicionale tek mobilizimi përmes rrjeteve sociale, rritjen e algoritmeve dhe krizën e debatit të bazuar në fakte.
Pas drekës, Prof. Alfred Marleku mbajti ligjëratën kryesore E ardhmja e demokracisë në epokën e emocioneve digjitale, duke shpjeguar se si rrjetet digjitale, algoritmet dhe komunikimi emocional ndikojnë në pjesëmarrjen qytetare dhe në strukturat e pushtetit. Më pas vijoi sesioni Autoritarizmi i Ri – kaosi i organizuar dhe kontrolli digjital, një analizë me raste konkrete e udhëhequr nga Zeneli. Mbrëmja përfundoi me aktivitetin e hapur Kafeneja e Ideve – “Gjenerata ime dhe Demokracia”.
Dita e dytë filloi me përmbledhjen e ditës së parë, e ndjekur nga fokusimi në IA. Prof. Blerton Abazi mbajti sesionin Çfarë është Inteligjenca Artificiale?, duke ofruar shembuj praktikë dhe aplikime të IA-së në jetën e përditshme. Pas pushimit, Rina Mehana udhëhoqi debatin IA dhe vlerat demokratike – transparenca, drejtësia dhe rreziqet etike, të shoqëruar me raste studimore.
Pas drekës, Visar Prebreza zhvilloi punëtorinë E vërteta në epokën e deepfake, duke analizuar raste reale të dezinformimit të prodhuar nga IA. Më tej, Labinot Leposhtica prezantoi sesionin Të Drejtat Digjitale dhe Rregullimi i IA-së, që trajtoi privatësinë, mbrojtjen e të dhënave dhe ndikimin e Aktit të BE-së për IA. Mbrëmja vazhdoi me aktivitetin social Darkë & Dialog – Liritë Digjitale dhe kuizin interaktiv.
Dita e tretë hapi me sesionin e Albert Krasniqit, IA dhe Zgjedhjet – një fushëbetejë e re demokratike, duke trajtuar mikro-targetimin, ndikimin algoritmik dhe përdorimin e deepfake-ve në fushata. Pas pushimit, Bernard Zeneli udhëhoqi sesionin Nga kampi në angazhim ndërkombëtar – Shkëmbimet Virtuale Erasmus+, ku pjesëmarrësit u njohën me mundësitë e bashkëpunimit evropian përmes platformave digjitale.
Kampi u mbyll me reflektimin përfundimtar, ndarjen e certifikatave dhe aktivitetin kreativ “Pema e Demokracisë dhe IA”.