Расійска-грузінскі канфлікт вакол Паўдневай Асэтыі непасрэдна паўплываў на двубаковыя адносіны паміж Расіяй і Беларусьсю, гэта пацвердзілі падзеі мінулых тыдняў. На фоне супярэчлівых выказванняў абодвух бакоў пакуль аднак складана ацэніць, якія каротка- і доўгатэрміновыя наступствы канфлікт можа мець на расійска-беларускія стасункі. Першая рэакцыя афіцыйнага Мінска на пачатак канфлікта ў Паўдневай Асэтыі была нечаканай па сваей форме. Толькі намесніца кіраўніка ўпраўлення інфармацыі МЗС Беларусі выказала глыбокую заклапочанасць узброеным канфліктам на Каўказе. Калі праз 4 дні ні адзін з высокапастаўленых беларускіх палітыкаў не выказаўся наконт канфлікта, расійскі пасол у Мінску Аляксандр Сурыкаў рэзка раскрытыкаваў беларускую пазіцыю.