19 დეკემბერს, კონრად ადენაუერის ფონდის წარმომადგენლობამ საქართველოში, საქართველოს პოლიტიკის ინსტიტუტთან თანამშრომლობით, გამართა საჯარო დისკუსია თემაზე: „ევროკავშირის გაფართოების გეოპოლიტიკა: საქართველოს მაგალითზე“.

ღონისძიებამ თავი მოუყარა სფეროს მაღალი რანგის ექსპერტებს, რომლებმაც წარმოადგინეს თავიანთი ხედვები ახალი გეოპოლიტიკური რეალობის შესახებ,   ევროკავშირის სამეზობლოში და ისაუბრეს ამ ახალი რეალობის საქართველოზე გავლენის შესახებ.

დისკუსია წარიმართა, ამ მიზნით შექმნილი პოლიტიკის დოკუმენტის საფუძველზე, რომელიც შედგენილ იქნა ნატალია საბანაძის

(აშშ-ს მაუნთ ჰოლიოკე კოლეჯის მიერ მოწვეული პროფესორი, საერთაშორისო ურთიერთობების განხრით) მიერ. მოცემული დოკუმენტი აანალიზებს ევროკავშირისა და საქართველოს ამჟამინდელ გამოწვევებს და გვაცნობს კონკრეტულ ქმედით რეკომენდაციებს აქტორებისთვის.

საჯარო დისკუსიაზე, ძირითადად, შემდეგ კითხვებზე იქნა ყურადღება გამახვილებული:

როგორ უნდა შეძლოს ევროკავშირმა, მის აღმოსავლეთით მდებარე ქვეყნების სამეზობლოში, ღირებულებებზე დაფუძნებულ საგარეო პოლიტიკასა და არსებულ რთულ გეოპოლიტიკურ ვითარებას შორის მოქმედება?

რომელია ყველაზე დიდი გამოწვევა, ევროკავშირსა და საქართველოს ამჟამინდელ ურთიერთობებს შორის?

როგორი უნდა იყოს თბილისისა და ბრუსელის მოკლე თუ გრძელვადიანი სტრატეგიები რეგიონში, სადაც მუდმივად მღელვარე და მყიფე ვითარებაა უსაფრთხოების თვალსაზრისით?

ღონისძიების დასასრულს, მომხსენებლებსა და დამსწრე საზოგადოებას შორის, გაიმართა ცოცხალი დისკუსია ამ კონკრეტულ თემებთან დაკავშირებით. სტუმრებმა ასევე გამოთქვეს სურვილი, სამომავლოდ, მსგავსი ფორმატის დისკუსიების ციკლის გაგრძელების თაობაზე.