Со оглед на тоа дека истражувањата на јавното мислење што во рамки на овој проект се спроведуваат, се едни од ретките кои даваа слика на религиозната карта во земјата, пописот на населението по 20 години беше една од таргет целите на ова истражување.
Истражувањето е подготвувано, пред и за време на објавувањата на резултатите, а спроведено речиси две недели по објавувањето на пописните резултати, со цел да се добие појасна и пореалистичка слика, без можни медиумски влијанија врз резултатите на испитаниците.
Истражувањето е поделено во три дела, кои испреплетуваат прашања кои треба да ја отсликаат перцепцијата на граѓаните за пописот, резултатите, како и за влијанијата врз одлуката на оние кои учествувале, или не учествувале во пописот.
Иако примарна цел на истражувањето е религиската определба, како паралела со пописните резултати, сепак во истражувањето се вклучени прашања околу мислењата на граѓаните за целиот пописен процес, што пак го прави прво вакво истражување, по објавувањето на резултатите, кое дава слика и оценка на граѓаните за пописот и нивното мислење за веродостојноста и евентуалните влијанија врз пописниот процес.
Од одговорите на овие вкрстени прашања истражувањето покажува една сложена слика за тоа како е спроведен пописот, а веројатно дава и одговор на дел од причините зошто пописните резултати даваат поинаква слика, од она што јавноста ја смета за религиска реалност во земјата.
Ова истражување, прво посветено на пописот, воедно е и одлична анализа која надлежните државни институции ќе можат да ја искористат, за да согледаат кои прашања се ранливи и како може да се превенираат.
Исто така, ова истражување е од исклучително значење за самите верски заедници, за да можат да препознаат, дали и каде е евентуалниот пропуст во комуникацијата на релација: Верска заедница – верници – државни институции.
Истражувањето е спроведено телефонски на репрезентативен примерок од 1114 испитаници постари од 18 години. Маргиналната грешка е помеѓу +/-3.2% со 95% интервал на веродостојност.
