Летната школа имаше за цел да придонесе кон професионалниот развој на младите новинари и медиумски работници преку унапредување на нивните знаења и практични вештини во областа на дигиталната и физичката безбедност, истражувачкото новинарство, етичкото известување, заштитата на новинарите, како и справувањето со стресот и професионалното прегорување.
Во текот на петте работни дена, учесниците работеа во интерактивна атмосфера што комбинираше предавања, дискусии, практични вежби и симулации на реални новинарски ситуации. Програмата беше осмислена да овозможи стекнување применливи знаења, развој на критичко размислување и размена на искуства меѓу младите новинари и медиумските професионалци.
Во рамките на програмата беа обработени теми поврзани со современите дигитални предизвици, заштитата на новинарските извори и податоци, безбедната работа во дигиталната средина и можностите и ограничувањата на примената на вештачката интелигенција во новинарството. Преку практични вежби учесниците се запознаа и со конкретни алатки и техники за дигитална безбедност.
Посебен сегмент беше посветен на менталното здравје и професионалната отпорност на новинарите, при што се дискутираше за стресот, професионалното прегорување, препознавањето на ризичните состојби и важноста од грижата за сопственото психофизичко здравје во професија што често подразбира работа под висок притисок.
Истражувачкото новинарство беше обработено низ повеќе аспекти, со акцент на процесот на развивање истражувачка приказна од првата информација до објавувањето, проценката и управувањето со ризици, проверката на фактите, професионалната одговорност и тимската работа.
Во рамките на програмата беше посветено внимание и на физичката безбедност на новинарите при известување од терен, практичната примена на техники за управување со ризици, новиот Етички кодекс на новинарите во Република Северна Македонија, професионалните стандарди при известувањето за теми од јавен интерес, како и механизмите за правна и институционална заштита на новинарите.
Особено значаен дел од школата претставуваа практичните симулации и групната работа, во рамките на кои учесниците работеа на реални новинарски сценарија, анализираа чувствителни случаи, носеа редакциски одлуки и ги применуваа знаењата стекнати во текот на програмата.
Во рамките на Летната школа свои обраќања имаа Даниел Браун, официјален претставник на Фондацијата Конрад Аденауер и Младен Чадиковски, претседател на Здружението на новинарите на Македонија, кои ја нагласија важноста од континуираното професионално усовршување, унапредувањето на безбедноста на новинарите и создавањето нова генерација медиумски професионалци што ќе работат согласно највисоките професионални и етички стандарди.
Со оваа активност, Тренинг-академијата за новинари и медиумски работници (Т-АЈМ) продолжува да обезбедува простор за едукација, размена на искуства и професионално вмрежување, придонесувајќи кон развојот на квалитетно, одговорно и отпорно новинарство во Северна Македонија.
